ដោយ៖ លនស្រស់
ភ្នំពេញ៖ ការសាងសង់ផ្លូវក្រវាត់ព្រំដែន សម្រេចបាន ៩៨,៨៧ ភាគរយហើយ ខណៈកងកម្លាំងវិស្វកម្ម កំពុងពន្លឿនការសង់ផ្លូវទៅកាន់ “ តំបន់កន្ទុយនាគ “ ដែលជាចំណុចប្រសព្វព្រំដែនកម្ពុជា ឡាវ និងវៀតណាម ។ នេះបើយោងតាមសេចក្តីប្រកាសព័ត៌មានរបស់ក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន ( ក.គ.ម ) នៅថ្ងៃទី១៨ ខែសីហា ។
ក្រុមការងារ ក.គ.ម បានបញ្ជាក់ថា គិតចាប់ពីខែធ្នូ ឆ្នាំ២០២៤ មកដល់ថ្ងៃទី១៣ ខែសីហា ឆ្នាំ២០២៦ ការកសាងផ្លូវក្រវាត់ព្រំដែនសម្រេចបានប្រមាណ ៩៨,៨៧ភាគរយ នៃផែនការរួម ដែលមានប្រវែងផ្លូវសរុប ២៦៤,៤០ គីឡូម៉ែត្រ។ ក្នុងនោះ ខេត្តមណ្ឌលគិរី សម្រេចបាន ១០០ភាគរយ និងខេត្តរតនគិរី សម្រេចបាន ៩៧,៦៣ភាគរយ។
ដោយឡែក នៅខែកក្កដា ឆ្នាំ២០២៥ កងកម្លាំងវិស្វកម្ម បានឈូសឆាយបើកផ្លូវទៅដល់បង្គោលលេខ០ នៃតំបន់កន្ទុយនាគ ដែលជាចំណុចប្រសព្វគ្នានៃព្រំដែនប្រទេសទាំង៣ កម្ពុជា ឡាវ និងវៀតណាម និងកំពុងបន្តសង់ផ្លូវឆ្ពោះទៅតំបន់នេះ ដើម្បីឱ្យ ការធ្វើដំណើរមានភាពងាយស្រួល។
នៅក្នុងដំណើរការកសាងផ្លូវព្រំដែនប្រមាណ ២០ខែមកនេះ ក្រុមការងារ ក.គ.ម បានឈូសព្រៃទទឹង ៥ ម៉ែត្រ លើដីជាក់ស្តែងបានប្រវែង ២៦៤,៤០ គីឡូម៉ែត្រ សម្រាប់រកផ្លូវខ្សែដំបូង, ឈូសផ្លូវទទឹង ២០ ម៉ែត្រ បានប្រវែង ២៦៤,៤០ គីឡូម៉ែត្រ សម្រាប់រកអ័ក្សផ្លូវ, លុបជ្រលង បន្ទាបចំណោតភ្នំ ចិតជញ្ជាំងភ្នំ និងជីកប្រឡាយបង្ហូរទឹកភ្លៀង និងកសាងតួផ្លូវ សម្រេចបានប្រវែង ២៦១,៩០ គីឡូម៉ែត្រ, និងចាក់ក្រាលល្បាយកម្ទេចថ្ម-កិនបង្ហាប់បានប្រវែង ២៥១,៩០គីឡូម៉ែត្រ។
ក្រៅពីនោះ ក្រុមការងារចំពោះកិច្ច ក.គ.ម បានកសាងសម្រេចជាស្ថាពរ សំណង់សិល្បការ្យរួមមាន លូប្រអប់ ៥៤ កន្លែង ឬស្មើនឹង ៤៦៤,៧០ ម៉ែត្រ, ដាក់លូមូលបេតុងគ្រប់ប្រភេទ ៤៨៤ កន្លែង, និងស្ថាបនាសម្រេចជាស្ថាពរ នូវសំណង់បេតុងរក្សាទឹកទុកប្រើប្រាស់ ១៤ កន្លែង ឬស្មើនឹង ៣០៥,៤០ ម៉ែត្រ។ ក្នុងនោះ ថ្នល់បេតុងបង្ហូររក្សាទឹកទុកប្រើប្រាស់ សម្រេចបាន ៧ កន្លែង ឬស្មើនឹង ២៤៥ ម៉ែត្រ, ទំនប់បេតុងបង្ហូររក្សាទឹកទុកប្រើប្រាស់ សម្រេចបាន ៧ កន្លែង ឬស្មើនឹង ៦០,៤០ ម៉ែត្រ និងស្ថាបនាស្ពានបេតុង សម្រេចបានចំនួន ២ កន្លែង ប្រវែង ៥៤ ម៉ែត្រ។
បន្ថែមពីលើនេះ ក្រុមការងារចំពោះកិច្ច ក.គ.ម ក៏បានកសាងបង្គោលស្លាកមូលនិធិ បានចំនួន ៦កន្លែង លើផែនការ ៨កន្លែង និងបានដាំកូនត្នោត ដែលជាអត្តសញ្ញាណជាតិ ៥ ១៦៦ ដើមផងដែរ។
ដំណើរជីកកកាយធ្វើផ្លូវនេះ ក្រុមការងារ ក.គ.ម បានរាវរកគ្រាប់មីន-យុទ្ធភណ្ឌមិនទាន់ផ្ទុះលើផ្ទៃ ៦ ៦១០ ០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទ ១០៦ គ្រាប់, លោហធាតុ ១ ០០៦ គីឡូក្រាម ក្នុងនោះរួមមាន គ្រាប់បែកចង្កោម ចំនួន ៤៣គ្រាប់។
ចំពោះមុខនេះ ក្រុមការងារ ក.គ.ម ប្ដេជ្ញាបន្តយកចិត្តទុកដាក់ថែទាំបច្ចេកទេសខ្សែផ្លូវក្នុងទិសខេត្តមណ្ឌលគិរី ដែលបានស្ថាបនារួច ដើម្បីធានាគុណភាព និងបង្ការការខូចខាតក្នុងរដូវវស្សា។
ជាមួយគ្នានេះ ក្រុមការងារក៏កំពុងពន្លឿនការសាងសង់ផ្លូវ និងសំណង់សិល្បការ្យគ្រប់ប្រភេទនៅទិសខេត្តរតនគិរី ព្រមទាំងដឹកជញ្ជូនប្រេងឥន្ធនៈ សម្ភារ និងវត្ថុធាតុដើមចូលការដ្ឋាន ដើម្បីបញ្ចប់គម្រោងផ្លូវក្រវាត់ព្រំដែននេះតាមផែនការ៕
អត្ថបទនិងរូបភាព ៖ ក្រុមការងារចំពោះកិច្ច គ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន ( ក.គ.ម ) នៅថ្ងៃទី១៨ ខែសីហា ឆ្នាំ២០២៦
